|
丁煒章，生於工業世家，祖父是「塑膠大王」丁熊照，父親是「玩具大王」丁鶴壽。含着玩具出世，大可食老本，但他偏偏選擇認真地玩轉「玩具王國」，為行頭創新出路。五年前同時從父親手上，接棒做香港優質標誌局 （簡稱Q嘜局）主席，他的樂園擴大了版圖，日常生活「無Q不歡」，衣食住行樣樣是Q嘜。他甚玩得，提出蒙眼試食分辨Q嘜月餅牌子，話一定食得出，實情他的舌頭的確相當靈敏，原來他曾在家中認真備戰，「做咩事都要認真，認真先會做得好，做Q嘜主席，點可以分唔出Q嘜產品？」行年五十，滑水、打乒乓波、逛懷舊玩具鋪、捉精靈乜都啱，完全是童心未泯。
考驗丁煒章味蕾的試食測試，在長沙灣工業總會總部進行，他當日因開會耽誤而遲到，急步趕到後馬上搭搭記者膊頭說：「不好意思」，「老闆」光環頓然消失，取而代之是「貼地」的親切感。
他自顧自準備蒙眼試食，還得戚地說：「每年中秋都買定三、五盒放在雪櫃，攤長一年慢慢食，但依家年紀大，每次限食八分一個，不過今次可以攞正牌食多啲。」他得意洋洋戴上眼罩。四款月餅之中，三款有Q嘜認證，記者打亂次序給他逐一試食。
果然，「雜嘜」月餅逃不過他的金舌頭，一試便中。另外三款Q嘜月餅，則估中其中一款。他舉起食指不服氣地笑說：「我會返去苦練，下年搞比賽同公眾一齊玩，蒙眼試食八款月餅。」
加入香港優質標誌局十三年、做了五年主席的丁煒章，是活生生的Q嘜代言人，日常生活中衣食住行幾乎「無Q不歡」。「屋企用的管理公司，出入搭的港鐵，幫襯的洗衣鋪全部都有Q嘜，仲有我最鍾意食嘅午餐肉，都指定買有Q嘜。但前排食太多，老婆依家行配給制，一星期只准食一罐。」
爺爺是「塑膠大王」丁熊照，父親是「玩具大王」丁鶴壽，他自小在玩具王國?浸淫，如今半百之齡，仍保持着一副「初心」，閒時經常行懷舊玩具鋪，尋找童年遺憾。事關兒時玩具唾手可得，他卻不識貨，寧願跟另外四兄弟姊妹玩捉迷藏，多過玩玩具。「細個曾有齊一套《星戰》玩具，但無好好保存，依家想搵返都難。」
大?細?路
在去年中秋節，他趁開完會的空檔到灣仔玩具鋪尋寶。甫入內，他已看中心頭好，「呢個放映機係我兒時嘅小戲院，老竇有專利生產，之後傳咗去日本發揚光大。」他如獲至寶，爽快付款。他愛玩，但投身玩具業卻是始料不及，「細個親眼見過大機器生產出各樣玩具，當時只覺得新奇，唔知生產係咩一回事，更加無諗過大個會做當家。」中學畢業後，他負笈加拿大多倫多大學讀機械工程。「冇諗過畢業做咩，大學揀選修科只係揀易讀嘅就算，報咗核能和勞工關係。」他續說。
暑假返港，丁煒章第一次沾手父業，在其公司廣達由低做起，但只做了一個暑假便走夾唔唞，並非捱不到苦，而是太「他條」。「同事太照顧我，無嘢學。」第二年去加拿大的工程公司做學徒，幫工程師畫圖則，研究冷氣、中央防火工程。「喺出面被鬧到狗血淋頭，但學到唔少嘢。」家族工廠是溫室，要學真功夫，就要出外闖闖被糟質。「唔捱唔知世界艱難和險惡，第日可以免做炮灰。」他說。
89年大學畢業後，丁煒章去美國伍斯特理工學院進修工商管理碩士，「畢咗業，唔夠膽同阿爸講想返公司幫手，怕做唔嚟。」說起父親，他又敬又畏。
直至96年，父親派他到廣達位於加拿大的廠房做廠長，一個人打骰管四十多名員工。「話就話做廠長，其實係打雜，洗廁所、坐生產綫入箱、上螺絲、揸鏟車入櫃我都做過。」太子爺淪為阿四，令他體會到前綫員工的辛酸，更深明管理重要，於是鑽研通用電氣前總裁傑克．威爾許（Jack Welch）的著作偷師，「佢提出由同事甚至客人，對員工做表現評估，我覺得在華人社會行唔通，事關中國人要面。」他搖頭歎息。
大?打?雜
在外國放逐四年，二千年父親抱恙，打算鋪路退休，於是召他返港，正式加入父親創立的廣達集團，做其助理。以為英雄終有用武之地，「點知返工第一個任務係幫爸爸寫公職清單，寫咗一個月。那時先知佢咁多公職，佔了他八成時間。」他兒時經常疑惑，為何父親總是早出晚歸，每晚十點前不見人，這個謎那刻才解開。「阿媽想同阿爸食飯，要趁工總或扶輪社開會，跟埋去先見到佢，我哋幾兄弟姊妹的生日，佢都成日唔記得。」他苦笑說。
童年錯失親子時光，長大後成為父親左右手朝夕相對，方知父親是本看不完的活字典，「經常跟父親行廠視察，佢話工廠運作和管理有好大關係，但佢行得好快。多年後我先知，佢行得快係想睇多啲，記低唔滿意的地方，叫下屬改善。行得多，遇上蠱惑員工就唔會咁易畀佢呃到。」這本活字典還蘊藏處事的傳統智慧，「他重視主次先後，好似有客人同枱食飯，坐佢右邊的一定係阿媽，左邊係主客，阿媽右邊就係第二客人。」在工作上，父親同樣主次分明，將公職和公司業務處理得妥妥貼貼。
做了一年大跟班，父親以健康為重，將半生基業交給他，「邊做邊學，做錯嘢都會畀佢鬧，好瘀。」丁煒章今日貴為集團掌舵人十多年，但他還是說：「以前公司有重大決定，仲會偷雞問老闆意見。」他口中的「老闆」，原來是指父親，因為公事上他習慣稱呼對方為「老闆」；人生旅途上，父親是他偶像，「爺爺、爸爸及阿叔（丁午壽）都是我偶像，我永遠是後輩要向他們學習，如果佢哋值一百分，我得七十。」
大?學?徒
如今，丁煒章踏上父親以前走過的路，經常公司、公職兩邊走，各佔據一半工作時間，「已係個人極限，但都未及老闆當年的一半。」外界猜測他是下屆工總主席熱門人選，他坦言無意競逐，亦無意從政，「唔係呢方面的材料，目前只想做好呢隻Q，之後會研究環保技術同電子錢包方面的發展，在網上做推廣。」說起Q嘜，他寧舍上心。
放下工作，丁煒章還是一對仔女的父親，大女正在加拿大讀工程系一年級，細仔則在香港讀中三。「如今最想多做運動，做少啲工作，花多些時間陪他們。今年結婚二十周年，下個月去旅行同老婆慶祝。我一請假，對秘書係好大件事。」他說。
至於手上的祖業，他坦言沒有刻意要子女繼承，「佢哋的前途自己揀，我唔會逼他們，好似個女話要跟我讀工程，我都冇畀壓力佢，最緊要讀好啲書就得。」而在工作和家庭以外，他還是喜歡繼續做大細路，大唔透。
產椰菜娃娃 響?名?堂
香港的玩具業曾經跟紡織製衣、電子和鐘表，並列本港四大經濟支柱，上世紀不少出口到外國的玩具，都由丁煒章爺爺開設的開達集團生產，就如八十年代紅透美國的椰菜娃娃，開達高峰期每日生產五萬三千隻，短短幾年賣出三千萬隻，是業界一時佳話。
幾十年過去，如今玩具業也要轉型，丁煒章指公司昔日生產的玩具現已買少見少，走懷舊復古是一個發展方向，「舊年工總搞了個玩具天堂展覽，展出千幾件香港唔同年代生產的玩具，反應唔錯。」他透露康文署在今年3月會再大搞懷舊玩具博物館展覽 ，「到時會展出四隻人咁大的忍者龜，我搵咗好耐。」他興奮地說。
本文摘自2016年9月21日《東周刊》 人物傳奇
|
|
|
|
